19 de outubro de 2009

E así andamos na Galiza

Pedindo respecto.
Este domingo houbo unha manifestación en Santiago, apoiada entre outros por PSdeG, BNG, EU-IU, Partido Galeguista, FPG, NÓS-UP, CIG, CCOO, UXT, SLG, STEG, TeGa, as plataformas Galego, patrimonio da humanidade, Galego Sempre Mais, ProLingua, A mesa pola normalización linguística, etc.

Segundo La Voz de Galicia, "Fuentes de la Policía Local compostelana cifraron en más de 50.000 los asistentes a la concentración". Os que menten e sementan xenreira tamén se manifestaron hai tempo, menos mal que son poucos!.

Tamén podedes ler a noticia en leoeosseus, en cousas pequenas, en aopedofarelo, na Voz, en Vieiros,... Eu deixovos coas palabras de Celso Emilio Ferreiro que é o meu poeta, pois a súa poesía éncheme como non o fai outra. É incrível que foran escritas aló polos anos 60 e aínda teñan tanta validez. Podédela ler en castelán aquí

Deitado frente ó mar
"Lingoa proletaria do meu pobo
eu fáloa porque sí, porque me gosta,
porque me peta e quero e dame a gaña;
porque me sai de dentro, alá do fondo
de unha tristura aceda que me abrangue
ao ver tantos patufos desleigados,
pequenos mequetrefes sin raíces
que ao pór a garabata xa non saben
afirmarse no amor dos devanceiros,
falar a fala nai,
a fala dos abós que temos mortos,
e ser, co rostro erguido,
mariñeiros, labregos do lingoaxe,
remo i arado, proa e rella sempre.

Eu fáloa porque sí, porque me gosta
e quero estar cos meus, coa xente miña,
perto dos homes bós que sofren longo
unha historia contada en outra lingoa.
Non falo pra os soberbios,
non falo pra os ruís e poderosos,
non falo pra os finchados,
non falo pra os estúpidos,
non falo pra os valeiros,
que falo pra os que agoantan rexamente
mentiras e inxusticias de cotío;
pra os que súan e choran
un pranto cotidián de volvoretas,
de lume e vento sobre os ollos núos.
Eu non podo arredar as miñas verbas
de todos os que sofren neste mundo.
E ti vives no mundo, terra miña,
berce da miña estirpe,
Galicia, doce mágoa das Españas,
deitada frente ao mar, ise camiño..."